Ukrainës i lejohet të përdorë raketa me rreze të gjatë veprimi kundër objektivave që i konsideron të përshtatshme – madje edhe thellë në Rusi. Kjo është ajo që thotë kancelari Friedrich Merz, i cili pretendon se Shtetet e Bashkuara janë dakord.
Sulmet ajrore të kësaj fundjave ishin më të gjera që kur Vladimir Putin filloi luftën e tij. Sipas të dhënave ukrainase, rreth 900 dronë sulmuan Ukrainën gjatë tre netëve dhe zhgënjimi midis aleatëve të Ukrainës po rritet, edhe me Donald Trumpin.
Pas fjalëve se udhëheqësi rus është “çmendur”, presidenti amerikan tani po shqyrton sanksione të reja kundër Rusisë, raporton Wall Street Journal.
Në të njëjtën kohë, Shtetet e Bashkuara, së bashku me Mbretërinë e Bashkuar, Gjermaninë dhe Francën, po heqin të gjitha kufizimet e mbetura se sa larg në Rusi lejohet Ukraina të përdorë raketat me rreze të gjatë veprimi që ofrojnë vendet.
“Nuk ka më kufizime në rrezen e veprimit për armët e dërguara në Ukrainë – as nga britanikët, as nga francezët, as nga ne dhe as nga amerikanët”, tha kancelari i sapozgjedhur i Gjermanisë, Friedrich Merz, për transmetuesin gjerman WDR.
Donald Trump nuk e ka konfirmuar vendimin, por deklarata vjen pas fjalëve jashtëzakonisht të ashpra të Trump për Putinin, në të cilat ai shkruan, ndër të tjera, se përpjekjet e vazhdueshme për të marrë kontrollin e të gjithë Ukrainës do të çojnë në “shkatërrimin e Rusisë”.
Gjatë fushatës zgjedhore, Merz deklaroi vazhdimisht se Gjermania duhet ta furnizojë Ukrainën me raketën Taurus, e cila ka një rreze veprimi prej rreth 500 kilometrash dhe kështu i mundëson Ukrainës të godasë Moskën ose bazat ushtarake pranë kryeqytetit rus, shkruan The Times. Ai ka thënë, gjithashtu, se nuk do të njoftojë nëse dhe kur ky lloj armatimi do të dërgohet në Ukrainë.
Zëdhënësi i Putinit, Dmitry Peskov, i quan fjalët e Merz “vërtet të rrezikshme” dhe se ato “qëndrojnë në kundërshtim të drejtpërdrejtë me përpjekjet për të arritur një zgjidhje politike”. Rusia ka paralajmëruar prej kohësh për pasojat nëse Ukraina do të sulmonte Rusinë me raketa me rreze të gjatë veprimi.
Këtë javë, Merz do të presë presidentin ukrainas, Volodymyr Zelensky, në Berlin, ku të dy udhëheqësit do të diskutojnë mbështetjen shtesë ushtarake dhe planet për sanksione të reja të BE-së kundër Rusisë. Sanksione që pritet të jenë të ashpra. Të hënën, presidenti francez, Emmanuel Macron, tha se Shtetet e Bashkuara dhe Evropa – pas bombardimeve të fundjavës – duhet t’i caktojnë një afat Putinit.
“Që të gjithë ta kuptojnë më në fund se ai po gënjen. Dhe nëse ai nuk vepron para asaj kohe, do të ndërmerret hakmarrje e fortë. Sidomos në formën e sanksioneve”, tha Macron.
Shefja e Punëve të Jashtme të BE-së, Kaja Kallas, thotë gjithashtu se BE-ja planifikon të vendosë sanksione të mëtejshme kundër Rusisë pas “sulmeve të tmerrshme” këtë fundjavë.
