Presidenti Donald Trump paralajmëroi të mërkurën se do të ketë “pasoja shumë të rënda” nëse presidenti rus, Vladimir Putin, nuk pranon të ndalë luftën kundër Ukrainës pas takimit të tyre këtë javë në një samit në Alaskë.
Trump e bëri komentin si përgjigje ndaj një pyetjeje nga një gazetar, pasi kishte shpallur fituesit e këtij viti të “Kennedy Center Honors” në Uashington. Ai nuk sqaroi se cilat mund të jenë pasojat.
Deklarata erdhi pak pasi Trump u konsultua me liderët evropianë, të cilët thanë se presidenti i kishte siguruar që do ta bënte prioritet përpjekjen për të arritur një armëpushim në Ukrainë kur të flasë me Putinin të premten në Anchorage, raporton AP.
Presidenti ukrainas Volodymyr Zelenskyy iu bashkua disa prej aleatëve kryesorë të Kievit në takimin virtual me liderin amerikan dhe u tha pjesëmarrësve se Putin “po bën blof” para samitit të planifikuar, duke pretenduar se Rusia është në gjendje të pushtojë gjithë Ukrainën dhe të përballojë sanksionet.
Kancelari gjerman Friedrich Merz tha më pas se në Alaskë mund të merren “vendime të rëndësishme”, por theksoi se “interesat thelbësore të sigurisë evropiane dhe ukrainase duhet të mbrohen.”
Merz organizoi takimin e së mërkurës për t’u siguruar që zëri i liderëve evropianë dhe ukrainas të dëgjohet para samitit. Ai theksoi se armëpushimi duhet të jetë hapi i parë në negociata. Për gazetarët, Merz tha se Trump “dëshiron gjithashtu ta bëjë këtë një nga prioritetet e tij” në takimin me Putinin.
Në një paraqitje të veçantë në Francë, presidenti francez Emmanuel Macron tha se Trump “ishte shumë i qartë” që SHBA dëshiron të arrijë një armëpushim në samit.
Pas samitit të së premtes, shtoi Macron, Trump do të “kërkojë një takim të ardhshëm trepalësh” — ku do të merrnin pjesë Trump, Putin dhe Zelenskyy. Ai shprehu shpresën që ky takim të mbahet në Evropë “në një vend neutral të pranueshëm për të gjitha palët.”
Merz, i cili e përshkroi bisedën e së mërkurës si “konstruktive dhe të mirë”, tha se evropianët e bënë të qartë që “Ukraina duhet të jetë në tavolinë sapo të ketë takime të tjera pasuese.”
Aleatët evropianë kanë këmbëngulur për përfshirjen e Ukrainës në çdo bisedim paqeje, duke u frikësuar se diskutimet që e përjashtojnë Kievin mund të favorizojnë Moskën.
Presidenti ukrainas, i cili udhëtoi në Berlin për t’iu bashkuar takimit së bashku me Merzin, ka shprehur vazhdimisht dyshime nëse Putini do të negociojë me sinqeritet. Ai tha të mërkurën se shpreson që një armëpushim i menjëhershëm të jetë “tema qendrore” në Alaskë, por gjithashtu argumentoi se Putini “me siguri nuk dëshiron paqe.”
