Kryeministri në detyrë, Albin Kurti, ka thënë se sipas tij, ka ofruar kompromiset e tij për formimin e institucioneve të reja të legjislaturës së nëntë.
“Ne kemi ofruar dy kompromise, i pari ka qenë që në rastin e votimit të fshehtë, nëse nuk zgjedhet me të parin kandidatja Albulena Haxhiu, atëherë do të sjellim emër tjetër. Kompromisi i dytë ka qenë që të merremi vesh për paketën ku bën pjesë kryetari i Kuvendit, nënkryetarët dhe më pastaj të kthehemi te votimi i hapur. Ne kemi bërë hapa, nuk ka pasur hapa nga pala tjetër dhe të mos harrojmë që Gjykata Kushtetuese kur me aktgjykimin paraprak na pati thënë që me pikën e veçantë se marrëveshjet politike duhet të arrihen ndërmjet grupeve parlamentare, sepse mosmarrëveshjet nuk i zgjidh gjykata, menjëherë partitë opozitare dërguan sërish lëndë”, ka thënë Kurti, raporton RTKlive.
Ai në përurimin e shërbimit të hemodializës në Podujevë, ka thënë se ishin dy partitë opozitare PDK dhe LDK që pavarësisht kërkesës për gjetjen e një zgjidhje politike, sërish iu referuan Gjykatës Kushtetuese.
“Kosova është stabile, po përparon por nuk ka Kuvend”, tha shkurt ai, duke përmendur sipas tij, rritjen ekonomike në vend.
