Ministria e Jashtme e Ukrainës ka reaguar ndaj komenteve të një ligjvënësje amerikane me origjinë ukrainase, e cila tha se Kievi “duhet t’i dorëzojë territorin Rusisë” dhe presidenti Volodymyr Zelensky duhet të japë dorëheqjen.
Në një intervistë për The Telegraph të publikuar më 7 prill, Victoria Spartz tha se Ukraina nuk është në gjendje të kërkojë kthimin e të gjitha territoreve të okupuara.
“Nëse ata do të fitonin luftën, kjo do të ishte shumë ndryshe”, tha ajo, duke shtuar se populli i Ukrainës duhet të kërkojë dorëheqjen e Zelenskyt, shkruajnë mediat e huaja.
“Ndryshe nga Victoria, e gjithë toka jonë ka qenë gjithmonë dhe do të mbetet gjithmonë ukrainase”, ka qenë reagimi i zëdhënësit të Ministrisë së Jashtme të Ukrainës, Heorhii Tykhyi në X.
Edhe kryetari i Verkhovna Rada, Ruslan Stefanchuk, u shpreh gjithashtu, duke akuzuar Spartz se po i bënte jehonë narrativave të Kremlinit.
“Një, i lindur në Kiev, u bë përfaqësues i Putinit. Një tjetër, nga Chernihiv Oblast, diskuton “përshtatshmërinë” e heqjes dorë nga territoret ukrainase…”, tha Stefanchuk.
Spartz, që ka lindur në Chernihiv Oblast dhe emigroi në SHBA në vitin 2000, ka folur shpesh për luftën në Ukrainë në terma personalë.
E zgjedhur në Kongres në vitin 2021 dhe përsëri në 2024, ajo fillimisht mbështeti ndihmën e SHBA-së për Ukrainën, por që atëherë është bërë një kritike e zëshme si e administratës së Joe Biden, ashtu edhe e qeverisë së presidentit Volodymyr Zelensky.
Spartz, duke u përafruar me qasjen e presidentit të SHBA-së, Donald Trump për negociata me Rusinë, akuzoi Zelenskyn për mosrespektim të Trump gjatë përplasjes së tyre në Zyrën Ovale.
Ajo pretendoi se presidenti ukrainas “ofendoi presidentin amerikan” dhe “i bëri një shërbim të keq popullit ukrainas”, duke sugjeruar se ukrainasit duhet ta votojnë atë për largim nga detyra.
“Nëse e zgjedhin atë, ata do të humbasin pjesën tjetër të vendit”, ka paralajmëruar Spartz.
Në muajt e fundit, Spartz është distancuar publikisht nga politika e Ukrainës, duke përmendur “mungesën e strategjisë së qartë” dhe duke shprehur skepticizëm për ndihmën e vazhdueshme ushtarake.
Ajo kundërshtoi paketën e propozuar të ndihmës prej 60 miliardë dollarësh për Ukrainën në vitin 2024 dhe miratoi thirrjet e GOP për konvertimin e ndihmës ushtarake në hua.
