Kur do të ndërgjegjësohet Shaqir Fetai dhe të mos veprojë si një instrument pasiv në dorën e atyreve që nuk kanë aspak interes për të drejtat e myslimanëve dhe shqiptarëve në Maqedoninë e Veriut
Nga Mahir Rexhepi
Më 8 dhjetor 2024, në Shkup u mbajt akademia solemne “Dita e Kliment të Ohrit”, një ceremoni nën patronazhin e presidentes së shtetit Gordana Siljanovska-Davkova. Ngjarja mblodhi personalitete të shquara nga politika, shkenca dhe feja. Pa fije turpi, ftesës për pjesëmarrje në këtë event i përgjigjet edhe instalacioni i dhunshëm në krye të BFI-së, Shaqir ef. Fetain
A përfaqëson Shaqir Fetai interesat e komunitetit mysliman shqiptar
Shaqir Fetai, i cili duhej të ishte një zë i fuqishëm për mbrojtjen e të drejtave të myslimanëve dhe shqiptarëve në vend, sërish tregoi indiferencën e tij të zakonshme ndaj çështjeve thelbësore që shqetësojnë komunitetin. Ndërsa flamuri shqiptar digjet, gjuha shqipe mohohet dhe objektet e shenjta islame vidhen e tëhuajësohen, Fetai vazhdon të shfaqet në aktivitete që vetëm sa maskojnë padrejtësitë e shumta me fasadën e “dialogut ndërfetar”.Pjesëmarrja e tij në këtë ceremoni, në vend që të reflektojë një mbështetje të sinqertë për dialogun ndërfetar, thekson dështimin e tij për t’u përballur me provokimet antikombëtare dhe antifetare që i vijnë komunitetit shqiptar mysliman. Në këtë rast, kujtojmë rastin e dhimbshëm të Jeni Xhamisë në Manastir, e cila u shndërrua në një muze të kulturës krishtere, një akt që kaloi pa asnjë reagim serioz nga Shaqir Fetai dhe institucioni që ai drejton. Në vend që të përdorë pozitën e tij për të mbrojtur interesat e komunitetit që përfaqëson, Fetai duket se është kthyer në një figurë dekorative që mbështet agjenda të huaja. Ky qëndrim është një ofendim për ata që shpresojnë në një udhëheqje të vendosur, të aftë për të ngritur zërin kundër padrejtësive.Kur do të ndërgjegjësohet Shaqir Fetai dhe të mos veprojë si një instrument pasiv në dorën e atyreve që nuk kanë aspak interes për të drejtat e myslimanëve dhe shqiptarëve në Maqedoninë e Veriut? Përgjigjja mbetet ende një mister, por një gjë është e qartë: komuniteti meriton më shumë, ndërsa Shaqir Fetai i kapur nga “dora misterioze” mund të ofrojë vetëm dështim, dëshpërim dhe devalviim të çdo vlere. Mbase ky është misioni i tij jetësor!
Dialog ndërfetar apo dorëzim para padrejtësive
Pjesëmarrja e Shaqir Fetait në akademinë solemne “Dita e Kliment të Ohrit” është vlerësuar nga ai në FB-un e vet si “një shembull i rëndësishëm i mbështetjes së dialogut ndërfetar”. Megjithatë, ky interpretim bie ndesh me realitetin e hidhur me të cilin përballen myslimanët dhe shqiptarë aktualisht në Maqedoninë e Veriut. Ndërsa Shaqir Fetai e quan këtë ngjarje “një platformë për forcimin e lidhjeve midis liderëve fetarë dhe për një të ardhme të bashkuar,” institucionet shtetërore dhe fetare vazhdojnë të shpërfillin të drejtat dhe interesat e myslimanëve. Shembulli më i qartë është grabitja dhe tjetërsimi i xhamive historike, siç ndodhi me Jeni Xhaminë në Manastir, pa asnjë reagim serioz nga BFI apo nga vetë Shaqir Fetai. Ironikisht, ndërsa ai përpiqet të shfaqet si një “avokat i dialogut ndërfetar”, Fetai nuk ka arritur të mbrojë as interesat themelore të komunitetit mysliman të vendit. Ai përmend “forcimin e lidhjeve” me liderët e tjerë fetarë, ndërkohë që ai vetë nuk gëzon mbështetjen e as nga komunitetit mysliman, as nga institucioneve shtetërore dhe as nga ndërkombëtarët. Një udhëheqës i cili nuk është i pranuar nga vetë komuniteti që supozohet të përfaqësojë, nuk mund të jetë një aktor i besueshëm në asnjë dialog. Një të tillë mund ta shtyjnë përpara vetëm shërbimet e errëta të cilëe u shërben e të cilët e llogarisin si projeksion të veten!Kjo situatë ngre një pyetje të rëndësishme: A është Shaqir Fetai një lider i lajthitur që nuk e kupton realitetin, apo një figurë e shitur që ka zgjedhur të injorojë padrejtësitë për përfitime personale? Çfarëdo qoftë përgjigjja, sjellja e tij është e pafalshme për një njeri në pozitën e tij dhe një zhgënjim i madh për ata që kanë nevojë për një zë të fuqishëm në mbrojtje të të drejtave të tyre.
Mosmirënjohje apo strategji e llogaritur
Në lajmin e Shaqir Fetait të publikuar në FB-un e vet, ai përmend pezencën e figurës së Kryetarit të Kuvendit, Afrim Gashi dhe kaq! Sjellja e Shaqir Fetait për të përmendur vetëm emrat e funksionarëve aktualë shtetërorë, ndërsa anashkalon totalisht ata nga opozita shqiptare që dikur luajtën një rol të turpshëm në instalimin e tij në krye të Bashkësisë Fetare Islame (BFI), është një akt i dukshëm mosmirënjohjeje, por njëkohësisht edhe një strategji e llogaritur për mbijetesë politike.Kjo qasje ngre disa pikëpyetje serioze mbi karakterin dhe parimet e tij:
– Shaqir Fetai duket se e ka “harruar” me qëllim rolin e opozitës shqiptare që kontribuoi në vendosjen e tij në këtë pozicion, një vendim që shkaktoi tronditje dhe pakënaqësi të thella brenda komunitetit mysliman shqiptar. Një harresë e tillë është një shenjë e qartë e mosmirënjohjes dhe tradhtisë ndaj atyre që dikur, edhe për arsye të dyshimta, e mbështetën.
– Përmendja (disa herë!) vetëm e emrave të funksionarëve aktualë tregon se Fetai është i gatshëm të përshtatet me çdo rrethanë që i garanton mbijetesën në pushtet. Duke lënë pas dore opozitën, ai tregon se është më i interesuar të sigurojë mbështetjen e pushtetit aktual sesa të tregojë një qëndrim koherent dhe të ndershëm.
– Sjellja e tij dëshmon një varësi të plotë ndaj interesave të institucioneve shtetërore dhe atyre shërbimeve që e mbajnë në fuqi. Fetai nuk guxon të sfidojë status quo-në, madje as të falënderojë ata që kontribuuan në ngritjen e tij, sepse kjo mund të prishë “marrëdhëniet e imagjinuara” me pushtetin aktual.
– Kjo sjellje mosmirënjohëse dhe oportuniste është një tregues i qartë i mungesës së integritetit të Shaqir Fetait. Ai vazhdon të shfaqet si një lider i shkëputur nga vlerat themelore të mirënjohjes dhe drejtësisë, duke humbur edhe atë pak kredibilitet që mund të ketë pasur në sytë e komunitetit.
Sjellja e tij është një pasqyrë e dështimit të tij si lider shpirtëror dhe si një përfaqësues i interesave të myslimanëve shqiptarë në Maqedoninë e Veriut. Në vend që të jetë një shembull i ndershmërisë dhe falënderimit, Shaqir Fetai zgjedh të thellojë më tej hendekun e mosbesimit dhe zhgënjimit brenda komunitetit të tij.
Shaqir Fetai një “lider” që gjithnjë injorohet
Në akademinë solemne “Dita e Kliment të Ohrit”, e cila u mbajt në Shkup, vëmendja u përqendrua te fjalimet e Presidentes së shtetit dhe Kryetarit të Komunitetit Ortodoks, z. Stefani, ndërsa Shaqir Fetai, i ashtuquajturi “kryetari i Bashkësisë Fetare Islame (BFI)”, u injorua tërësisht. Kjo mosprani e një fjale përfaqësuese nga ana e Fetait, është një shembull i qartë i mospërfilljes institucionale ndaj tij.
Fakti që Fetai nuk u lejua të mbajë një fjalim apo të përfaqësojë zyrtarisht komunitetin mysliman në këtë ngjarje tregon mungesën e respektit që institucionet shtetërore dhe fetare kanë për të. Kjo sjellje vë në pah një hendek të madh në trajtimin e barabartë të komuniteteve fetare në Maqedoninë e Veriut dhe një nënvlerësim të rolit të BFI-së në jetën fetare dhe shoqërore të vendit.
Shaqir Fetai ka dështuar të krijojë një autoritet moral dhe institucional që do ta bënte një figurë të respektuar dhe të barabartë me liderët e tjerë fetarë. Pjesëmarrja e tij pa zë në këtë ceremoni tregon se Shaqir Fetai është i pranishëm vetëm për të legjitimuar ngjarje të tilla, pa pasur ndonjë rol real apo ndikim. Ai është kthyer thjesht në një figurë dekorative.
Ky injorim institucional është një mesazh i qartë, jo vetëm për Fetain, por edhe për komunitetin mysliman që ai përfaqëson. Në një ceremoni ku sipas Shaqir Fetait bashkëjetesa dhe dialogu ndërfetar ishin në qendër, mosdhënia e hapësirës për Shaqir Fetain për të folur është një shembull i qartë i dështimit për të promovuar barazi dhe respekt midis komuniteteve fetare. Por ky incident gjithashtu vë në dukje paaftësinë e tij për të kërkuar një trajtim të barabartë, duke e vendosur atë në një pozitë edhe më të pafavorshme në sytë e komunitetit që ai përfaqëson. Apo ndoshta nuk guxon ta kërkojë këtë trajtim pasi që dkush mund të hidhërohet dhe ta shqelmojë b… nga ai kolltuk që e ka uzurpuar dhe nga i cli, siç thotë ai, “mund të më largojnë vetëm në arkivol”!
