Danimarka ka thënë se Grenlanda nuk ka nevojë për ndihmë mjekësore nga vendet e tjera, pasi Presidenti i SHBA-së Donald Trump tha se po dërgonte një anije spitalore në Grenlandë, raporton Guardian.
“Popullsia e Grenlandës merr kujdesin e nevojshëm shëndetësor. Ata ose e marrin atë në Grenlandë ose, nëse kanë nevojë për trajtim të specializuar, e marrin atë në Danimarkë. Pra, nuk është se ka nevojë për një iniciativë të veçantë shëndetësore në Grenlandë”, tha Ministri i Mbrojtjes i vendit, Troels Lund Poulsen.
Në Grenlandë, ashtu si në Danimarkë, qasja në kujdesin shëndetësor është falas. Ekzistojnë pesë spitale rajonale në të gjithë ishullin e madh Arktik, dhe spitali në Nuuk u shërben pacientëve nga e gjithë territori.
Trump njoftoi dje se do të dërgojnë një anije spitalore në Grenlandë për t’u kujdesur për shumë njerëz që janë të sëmurë dhe për të cilët nuk kujdesen atje. Më herët të shtunën, Komanda Daneze e Arktikut njoftoi se kishte evakuuar një anëtar të ekuipazhit të një nëndetëseje amerikane në brigjet e Nuuk, pasi marinari kërkoi ndihmë mjekësore emergjente.
