Nga prapaskenat e negociatave sekrete të viteve ’90 deri te skandali i një miliarderi në Manhattan, gjithçka tregon se çështja Jeffrey Epstein është larg mbylljes. Zhvillimet e fundit kanë sjellë në qendër të vëmendjes diplomacinë norvegjeze, pas dorëheqjes së bujshme të ambasadores Mona Juul, e cila u gjend papritur në zemër të një stuhie ndërkombëtare.
Ministria e Punëve të Jashtme e Norvegjisë njoftoi zyrtarisht dorëheqjen e Juul, pas hetimeve që zbuluan lidhje të paqarta mes saj dhe Jeffrey Epstein, i dënuar për krime seksuale. Sipas raporteve të publikuara, këto kontakte nuk kanë qenë thjesht rastësore apo sipërfaqësore.
Zbulimet kanë shkaktuar tronditje të madhe: Epstein kishte parashikuar në testamentin e tij 10 milionë dollarë për dy fëmijët e Juul, si dhe për bashkëshortin e saj, diplomatin e njohur Terje Rød-Larsen. Ky fakt ka ngritur pikëpyetje serioze mbi natyrën dhe thellësinë e marrëdhënieve mes palëve.
Ministri norvegjez i Punëve të Jashtme i ka cilësuar këto kontakte si “një gabim shumë serioz”, duke theksuar se dorëheqja ishte i vetmi vendim i drejtë në këto rrethana.
Por kush është Mona Juul dhe pse rasti i saj ka shkaktuar kaq shumë zhurmë në qarqet evropiane dhe ndërkombëtare?
Juul nuk është një diplomate e zakonshme. Ajo konsiderohet si një figurë kyçe, madje një “kuti e zezë” e diplomacisë ndërkombëtare, për shkak të rolit të saj të rëndësishëm në Marrëveshjen e Oslos të vitit 1993. Gjatë karrierës së saj, ajo ka përfaqësuar Norvegjinë në Izrael, Britaninë e Madhe dhe në Kombet e Bashkuara.
Edhe bashkëshorti i saj, Terje Rød-Larsen, ka qenë një emër me peshë në diplomacinë globale, duke shërbyer si përfaqësues special i Sekretarit të Përgjithshëm të OKB-së për Lindjen e Mesme.
Skandali i fundit po shihet si një goditje e rëndë për imazhin e diplomacisë norvegjeze dhe si një paralajmërim i qartë se dosja Epstein ende nuk e ka thënë fjalën e fundit.
