Gjykata Themelore e Prishtinës ia ka caktuar të dielën masën e paraburgimit prej një muaji Igor Popoviqit, ndihmësdrejtor në të ashtuquajturën “Zyra për Kosovën”, e udhëhequr nga Petar Petkoviq.
Vendimi është marrë pas arrestimit të tij, si pasojë e deklaratave fyese që ai kishte dhënë ndaj Ushtrisë Çlirimtare të Kosovës gjatë një vizite në Rahovec.
Lajmin e ka konfirmuar Gjykata Themelore në Prishtinë përmes një njoftimi në Facebook.
“Gjyqtari i procedurës paraprake ka aprovuar kërkesën e Prokurorisë Speciale të Republikës të Kosovës për caktimin e masës së paraburgimit ndaj të pandehurit B.J., ashtu që të njëjtit i caktohet masa e paraburgimit në kohëzgjatje prej 1 (një) muaji”, thuhet në vendimin e Themelores.
Igor Popoviq dyshohet për kryerjen e veprës penale “Nxitja e përçarjes dhe mosdurimit”.
“Pas mbajtjes së seancës dëgjimore, gjykata vlerësoi se caktimi i masës së paraburgimit në këtë çështje penale është masë adekuate në këtë rast penal dhe se çdo masë tjetër do të ishte e pamjaftueshme për zbatimin e suksesshëm të procedurës penale, si dhe pengimin e rrjedhës normale të kësaj procedure penale”, theksohet në vendim.
