Presidentja meksikane, Claudia Sheinbaum kërcënoi se do të ndërmarrë veprime ligjore për mbeturinat dhe ndotjen e shkaktuar nga lëshimet e raketave SpaceX të miliarderit, Elon Musk në SHBA, përtej kufirit.
Qeveria meksikane po shqyrton se cilat ligje ndërkombëtare janë shkelur në mënyrë që të vazhdojë me ankesat e nevojshme sepse ka vërtet shumë ndotje, tha Sheinbaum gjatë konferencës së saj për shtyp.
Javën e kaluar, një raketë SpaceX Starship shpërtheu në platformën e lëshimit gjatë procesit të lëshimit në objektin e programit hapësinor të Elon Musk në Teksas, pranë kufirit meksikan.
Videoja e shpërthimit tregon raketën, e cila është rreth 40 kate e lartë, më e fuqishme ndonjëherë, duke u ndezur dhe duke u shndërruar në një top zjarri gjigant.
Autoritetet meksikane po vlerësojnë ndikimin mjedisor të lëshimeve të raketave në shtetin verilindor të Tamaulipas, i cili kufizohet me Teksasin, tha presidenti meksikan.
Grupet mjedisore ngritën një padi në vitin 2023 kundër autoriteteve amerikane, duke i akuzuar ato se nuk kanë vlerësuar siç duhet ndikimin e këtyre lëshimeve, ndërsa baza hapësinore e SpaceX në Teksas ndodhet afër në zona të mbrojtura natyrore.
Pavarësisht kritikave, Autoriteti i Aviacionit Civil të SHBA-së, FAA, dha dritën jeshile në fillim të majit për të rritur frekuencën e lëshimeve të Starship nga 5 në 25 fluturime në vit.
Një padi do të shënonte një betejë të re ligjore midis Meksikës dhe një kompanie të madhe amerikane.
Në maj, administrata Sheinbaum njoftoi padi kundër Google për ndryshimin e emrit të Gjirit të Meksikës në Gjirin e Amerikës për përdoruesit e Google Maps në SHBA, duke miratuar një vendim nga Donald Trump.
