Presidenti amerikan Donald Trump akuzoi të martën ish-presidentin Barack Obama për “tradhti”, duke pretenduar – pa ofruar asnjë provë – se ky i fundit kishte udhëhequr një përpjekje për ta lidhur në mënyrë të rreme me Rusinë dhe për të sabotuar fushatën e tij presidenciale në vitin 2016, raporton Reuters.
Zëdhënësi i Obamës, Patrick Rodenbush, reagoi menjëherë duke e cilësuar akuzën si “absurde dhe një përpjekje të dobët për të shpërqendruar vëmendjen nga problemet aktuale të administratës.”
Edhe pse Trump e ka sulmuar shpesh Obamën gjatë presidencës së tij, kjo është hera e parë që ai e akuzon publikisht paraardhësin e tij për vepra penale, që prej rikthimit në detyrë në janar, shkruan Reuters.
Gjatë një konference për shtyp në Zyrën Ovale, Trump u mbështet në deklaratat e drejtoreshës së inteligjencës kombëtare, Tulsi Gabbard, e cila të premten tha se do të referonte disa zyrtarë të administratës Obama në Departamentin e Drejtësisë për ndjekje penale, lidhur me një vlerësim të shërbimeve sekrete për ndërhyrjen ruse në zgjedhjet e vitit 2016.
Gabbard deklasifikoi disa dokumente që, sipas saj, dëshmojnë për një “komplot tradhtar” nga zyrtarë të lartë të administratës Obama për të dëmtuar kandidaturën e Trump. Demokratët i hodhën poshtë këto pretendime si të pavërteta dhe të motivuara politikisht.
“Është aty, ai është fajtor. Kjo ishte tradhti,” deklaroi Trump, pa paraqitur asnjë provë. “Ata u përpoqën të vidhnin zgjedhjet, të manipulonin procesin zgjedhor. Bënë gjëra që as në vendet më të korruptuara nuk ndodhin.”
