Prokuroria Themelore në Ferizaj ka njoftuar se ka ndaluar katër persona të dyshuar në lidhje me rastin e të shtënave me armë zjarri mes një qytetari dhe një zyrtari policor në Doganaj të Ferizajt.
Rasti ndodhi në orët e para të mëngjesit të sotëm, ku dy persona mbetën të plagosur.
“Me vendim të Prokurorit të Shtetit të Departamentit të Krimeve të Rënda, janë ndaluar në kohëzgjatje prej 48-orësh katër (4) persona të dyshuar me inicialet A.S., L.V., Sh.L., dhe L.K.”, thuhet në njoftimin zyrtar.
Të ndaluarit po hetohen për disa vepra penale të rënda, përfshirë: “Vrasje në tentativë”, “Mbajtje në pronësi, kontroll ose posedim të paautorizuar të armëve”, “Shkaktim i rrezikut të përgjithshëm”, si dhe “Pjesëmarrje në rrahje”, bazuar në Kodin Penal të Republikës së Kosovës.
Sipas Prokurorisë, incidenti ka ndodhur rreth orës 00:52, ku pas një përleshjeje me armë zjarri janë plagosur dy persona.
“Dy personat e lënduar pas dhënies së ndihmës së parë nga Emergjenca e Ferizajt janë transferuar në Qendrën Klinike Universitare të Kosovës (QKUK) për trajtim të mëtutjeshëm mjekësor”, thuhet në njoftim.
Nga vendi i ngjarjes, hetuesit kanë sekuestruar prova materiale, përfshirë dy vetura të dyshuara, dy armë zjarri, gjashtëmbëdhjetë (16) gëzhoja dhe një (1) predhë, që dyshohet të jenë shkrepur gjatë incidentit.
Prokurori i Shtetit ka autorizuar Policinë e Kosovës të ndërmarrë “të gjitha veprimet hetimore me qëllim të zbardhjes së të gjitha rrethanave të këtij rasti”.
