Presidenti kinez, Xi Jinping do të vizitojë Francën, Serbinë dhe Hungarinë javën e ardhshme pasi Pekini duket se kërkon një rol më të madh në konfliktin midis Rusisë dhe Ukrainës që ka përmbysur sigurinë globale politike dhe ekonomike.
Vizita e Xi, presidentit të Kinës dhe kreut të Partisë Komuniste në pushtet, është e para në Evropë në pesë vjet dhe do të “injektojë një vrull të ri në zhvillimin paqësor të botës”, tha zëdhënësi i ministrisë së Jashtme, Lin Jian në një konferencë të përditshme të hënën, raporton Associated Press.
Kina pretendon neutralitet në konfliktin e Ukrainës, por Xi dhe presidenti rus, Vladimir Putin deklaruan se qeveritë e tyre kishin një “miqësi pa kufi” përpara sulmit të Moskës në shkurt 2022 ndaj Ukrainës.
Kina ka refuzuar ta quajë sulmin rus një pushtim dhe është akuzuar se ka forcuar aftësinë financiare dhe teknologjike të Rusisë për të vazhduar prodhimin e armëve për përdorim kundër Ukrainës, e cila po pret dhjetëra miliarda dollarë ndihmë ushtarake për të kundërshtuar agresionin e Rusisë.
