“Ne e kuptojmë se IDF-ja (ushtria izraelite) e ka pranuar këtë gabim të papranueshëm dhe se qeveria izraelite po e heton këtë incident”, tha Departamenti i Shtetit
SHBA-ja tha të enjten se është “thellësisht e shqetësuar” për sulmin izraelit ndaj një automjeti të Programit Botëror të Ushqimit (WFP) në Rripin e Gazës, duke e quajtur atë “gabim të papranueshëm”, raporton Anadolu.
“Qeveria e SHBA-së është thellësisht e shqetësuar nga incidentet e vazhdueshme kundër organizatave humanitare që veprojnë në Gaza, përfshirë të shtënat direkte ndaj një automjeti të WFP-së të martën”, tha një zëdhënës i Departamentit të Shtetit, duke folur në kushte anonimiteti, në përgjigje të një pyetjeje nga Anadolu.
“Ne e kuptojmë se IDF-ja (ushtria izraelite) e ka pranuar këtë gabim të papranueshëm dhe se qeveria izraelite po e heton këtë incident; hetimi duhet të jetë i plotë dhe transparent; dhe mësimet e nxjerra duhet të përdoren për të parandaluar incidente të ngjashme në të ardhmen”, shtoi zëdhënësi.
SHBA-ja është “mirënjohëse” për përpjekjet e humanitarëve që punojnë në kushte jashtëzakonisht të vështira në Gaza dhe vazhdon t’i bëjë thirrje qeverisë izraelite që “të bëjë shumë më tepër për të mbrojtur civilët dhe punëtorët humanitarë”, tha ai.
WFP-ja njoftoi të mërkurën ndalimin e përkohshëm të lëvizjes së stafit në Gaza pasi një nga automjetet e saj u vu nën zjarr nga forcat izraelite në një pikë kontrolli. Automjeti, duke u kthyer nga një mision humanitar, u godit nga të paktën dhjetë plumba në një pikë izraelite kontrolli pranë urës Wadi Gaza, pavarësisht se ishte i shënuar qartë dhe kishte marrë leje paraprake nga autoritetet izraelite.
Sulmi nuk ishte incidenti i vetëm që përfshin punonjësit e ndihmave humanitare në Gaza. Më 1 prill, një sulm ajror izraelit në Gaza vrau shtatë punonjës të ndihmës së Kuzhinës Qendrore Botërore (WCK): tre shtetas britanikë, një australian, një shtetas polak, një shtetas të dyfishtë SHBA-Kanada dhe një palestinez.
Kryeministri izraelit Benjamin Netanyahu ka pranuar se ushtria e ka sulmuar autokolonën e WCK-së, por ishte shprehur se kjo ishte e paqëllimshme. Ushtria e ka karakterizuar sulmin si një “gabim të rëndë”.
Sipas OKB-së, më shumë se 280 punonjës të ndihmës janë vrarë në Gaza, ku shumica janë anëtarë të stafit të Agjencisë së OKB-së për refugjatët palestinezë (UNRWA).
