Sekretari i Përgjithshëm i Kombeve të Bashkuara, Antonio Guterres, akuzoi Izraelin të hënën për përhapjen e dezinformatave rreth tij gjatë luftës më shumë se tetë mujore midis Izraelit dhe militantëve palestinezë Hamas në Rripin e Gazës, shkruan Reuters.
“Kam dëgjuar të njëjtin burim shumë herë duke thënë se nuk e kam sulmuar kurrë Hamasin, se kurrë nuk e kam dënuar Hamasin, se jam mbështetës i Hamasit”, tha Guterres në një konferencë shtypi mbi integritetin e informacionit, pa përmendur emrin e Izraelit.
“Unë e kam dënuar Hamasin 102 herë, 51 prej tyre në fjalime zyrtare, të tjerat në platforma të ndryshme sociale. E vërteta, në fund, gjithmonë fiton”, tha ai.
Ambasadori i Izraelit në OKB, Gilad Erdan, tha se dënimet nga Guterres ishin “fjalë boshe në krahasim me veprimet e tij”.
“Qëllimi i tij i vetëm ka qenë të ndihmojë Hamasin t’i mbijetojë kësaj lufte. Ne e shohim të neveritshme që sekretari i përgjithshëm refuzon të respektojë standardet e OKB-së dhe përshkruan një pamje të shtrembëruar të ngjarjeve në terren. Antonio Guterres është bashkëpunëtor i terrorit dhe duhet të japë dorëheqjen sot”, shtoi Erdan.
Marrëdhëniet midis OKB-së dhe Izraelit kanë qenë prej kohësh të tensionuara dhe janë përkeqësuar gjatë luftës Izrael-Hamas.
Izraeli akuzoi OKB-në se ishte e njëanshme ndaj saj dhe ka akuzuar stafin e OKB-së për bashkëpunim me Hamasin dhe militantë të tjerë. OKB-ja po heton disa nga akuzat, por ka thënë se në shumë raste ende nuk ka marrë prova nga Izraeli.
