11
Të paktën 12 persona kanë humbur jetën dhe 39 të tjerë janë plagosur si pasojë e një sulmi me dronë ukrainas ndaj objektivave industriale dhe civile në qytetin Nizhnekamsk, në republikën ruse të Tatarstanit.
Lajmi u bë i ditur nga kryebashkiaku i qytetit, Radmir Belyaev, ndërsa autoritetet lokale njoftuan për shpalljen e një periudhe zie në Tatarstan.
Sipas mediave ruse, sulmi ka prekur edhe kompleksin e rafinerisë TANECO, një prej impianteve më të mëdha dhe teknologjikisht më të avancuara të përpunimit të naftës në Rusi.
Pamje të publikuara në rrjetet sociale tregojnë një kolonë tymi mbi një strukturë industriale që i ngjan rafinerisë. Megjithatë, autenticiteti i këtyre pamjeve nuk është verifikuar në mënyrë të pavarur.
Rafineria TANECO, në pronësi të kompanisë Tatneft, ishte shënjestruar edhe gjatë një sulmi ukrainas në fillim të qershorit. Në vitin 2024, impianti përpunoi rreth 17 milionë tonë naftë bruto, duke prodhuar, ndër të tjera, rreth 2.7 milionë tonë benzinë dhe 8.5 milionë tonë naftë.
Sulmet ukrainase ndaj infrastrukturës energjetike ruse janë intensifikuar gjatë muajve të fundit. Goditjet ndaj rafinerive kanë shkaktuar ndërprerje dhe mungesa të karburantit në disa rajone të Rusisë, megjithëse autoritetet ruse kanë deklaruar se pjesa më e madhe e problemeve është tejkaluar.
Ndërkohë, Rusia ka deklaruar se forcat e saj kanë marrë kontrollin e dy vendbanimeve në rajonin e Donetskut, në lindje të Ukrainës.
Sipas agjencisë ruse të lajmeve RIA, e cila citon Ministrinë ruse të Mbrojtjes, forcat ruse kanë pushtuar fshatin Vasjutinske, disa kilometra larg qytetit të fortifikuar të Kramatorskut, si dhe një vendbanim pranë Toreckut.
Autoritetet ukrainase nuk kanë dhënë konfirmim të menjëhershëm për humbjen e këtyre vendbanimeve.
Në të njëjtën kohë, burime ukrainase të monitorimit të frontit raportojnë për lëvizje të forcave ruse pranë Ilinivkës, në afërsi të Kostiantivkës, si dhe në zonën e Chasiv Yarit, në perëndim të Bakhmutit.
Shtabi i Përgjithshëm i Ushtrisë së Ukrainës njoftoi se forcat ukrainase kanë zmbrapsur 24 sulme në zonën e Kostiantivkës, Ilinivkës dhe sektorë të tjerë të frontit.
Luftimet vazhdojnë përgjatë një fronti prej rreth 1,200 kilometrash, ndërsa forcat ruse po përpiqen të avancojnë gradualisht drejt perëndimit në rajonin e Donetskut.