11
Marshimi kontrovers i Urdhrit Portokalli do të zhvillohet në një zonë nacionaliste të Irlandës së Veriut për herë të parë në gati 30 vjet, pas një vendimi të Gjykatës së Lartë në Belfast.
Gjykata rrëzoi një kërkesë për ndalimin e marshimit dhe vendosi që vendimi i Komisionit të Paradave për lejimin e tij duhet të respektohet.
Parada e Drumcree, e cila në vitet ’90 u shoqërua me protesta dhe trazira të rënda, do të kalojë përgjatë Garvaghy Road, por me disa kufizime. Marshimi duhet të nisë jo më vonë se ora 08:00 dhe do të lejohet pjesëmarrja e deri në 35 personave, ndërsa nuk do të ketë grupe muzikore apo mbështetës.
Çështja shkaktoi një seri përplasjesh ligjore gjatë fundjavës. Banorët e Garvaghy Road e kundërshtuan vendimin, duke paralajmëruar për rrezikun e përshkallëzimit të tensioneve.
Ndërkohë, përfaqësues të Urdhrit Portokalli kanë deklaruar se marshimi do të zhvillohet në mënyrë paqësore dhe në përputhje me ligjin.
Në zonë u mblodhën gjatë natës edhe protestues, ndërsa autoritetet kanë marrë masa të shtuara sigurie. Rreth 200 oficerë policie nga Skocia pritet të mbështesin operacionin e policisë së Irlandës së Veriut.
Mosmarrëveshja për marshimin në Drumcree daton që nga mesi i viteve ’90 dhe konsiderohet një nga episodet më të ndjeshme të historisë së trazuar politike dhe komunitare të Irlandës së Veriut.