Mbetjet mortore të dhjetë viktimave të luftës, që ishin në Listën e Personave të Zhdukur, të identifikuar së fundmi nga mbetjet mortore të zhvarrosura nga varreza masive në Bishtazhin, do të rivarrosen sot. Kështu ka bërë të ditur Komisioni Qeveritar për Persona të zhdukur që thotë se 4 prilli ishte kërkesë e familjarëve, në përvjetorin e Masakrës së Kralanit.
Nga ora 12:00 deri në orën 13:00 do të bëhen homazhe në Sallën e Sporteve “Adem Jashari”, Klinë.
Në orën 13:00 do të mbahet Aakademia Përkujtimore, po ashtu në Sallën e Sporteve në këtë qytet.
Ndërsa nga ora 14:30, siç është bërë e ditur, do të mbahet ceremonia e rivarrimit në Kompleksin Memorial “Kodra e Kuqe” në Grabanicë të viktimave Adem Gashi, Sahit Gashi, Bekim Hasani, Sheremet Ismajli, Osman Fejza, Shkelzen Hajdaraj e Bekim Gashi.
Ndërkohë, nga ora 16:30 në varrezat në Jashanicë të Klinës do të bëhet ceremonia e rivarrimit të Mentor Myrtajt.
Ceremoni rivarrimi do të ketë edhe në Malishevë. Aty do të bëhet rivarrimi i viktimës së luftës Vehbi Halilaj.
Paraprakisht do të bëhen homazhe në Shkollën “Petro Nini Luarasi”, në fshatin Llapqevë, e më pas edhe ceremonia e rivarrimit po në këtë fshat nga ora 14:00.
Ndërkohë, rivarrimi i viktimës së luftës Mentor Kryeziu do të bëhet në varrezat e fshatit Bubavec nga ora 16:30, por para kësaj do të ketë homazhe në Odën e Fshatit.
Ndërsa, siç ka bërë të ditur komisioni, rivarrimi i mbetjeve mortore të viktimës Sabedin Kryeziu, është organizuar më 21 mars 2025 në varrezat e fshatit Mleqan të Malishevës.
Derisa u kanë shprehur ngushëllime familjeve, Komisioni Qeveritar për Persona të Zhdukur thonë se mbeten të përkushtuar në zbardhjen e fatit te të gjithë personave të zhdukur me forcë gjatë luftës.
