Duke folur në një konferencë të përbashkët shtypi në kryeqytetin e Bratislavës me kryeministrin hungarez Viktor Orban, kryeministri sllovak Robert Fico tha: “Ne ndajmë të njëjtin mendim jo vetëm për atë që po ndodh në vendet tona, por edhe në skenën ndërkombëtare. ” , citohet të ketë thënë agjencia shtetërore e lajmeve Tars.
Lidhur me marrëdhëniet me SHBA-në, Fico tha se janë në të njëjtën faqe me presidentin e ri të SHBA-së, Donald Trump për shumë gjëra, përfshirë këtu edhe migrimin.
Kryeministri sllovak iu përgjigj gjithashtu kritikave nga opozita, e cila thotë se ai po e largon vendin nga politikat dhe institucionet perëndimore. “Theksoj se hapësira jonë e jetesës është BE dhe NATO, por ne kemi të drejtë të jemi kritikë”.
Orban, nga ana e tij, u pajtua me homologun e tij sllovak dhe tha: “Të dy vendet janë anëtare të BE-së dhe NATO-s. Dhe kështu do të mbetet.”
Për marrëdhëniet me Uashingtonin, ai tha se Evropa dhe SHBA janë dy shtyllat e Perëndimit.
Duke përshëndetur kthimin e Trump në detyrë, Orban nënvizoi se ata kanë pikëpamje të ngjashme me presidentin amerikan, për shumë çështje thelbësore.
“Prandaj, ne po bëhemi pjesë e rrjedhës kryesore ideologjike të botës perëndimore,” tha ai.
Ai tha se Hungaria dëshiron një fund të shpejtë të luftës së vazhdueshme në Ukrainë, përmes një zgjidhjeje diplomatike dhe është kundër sanksioneve ndaj Rusisë, veçanërisht në sektorin e energjisë.
Orban tha se sanksione të tilla po minojnë interesat e BE-së.
“Kjo është arsyeja pse ne jemi të kënaqur që zoti Fico foli me zë të lartë duke kritikuar ndërprerjen e tranzitit të gazit përmes Ukrainës, dhe vuri në dukje ndikimin negativ të këtij hapi në Evropë,” shtoi ai.
