Donald Trump përjashtoi mundësinë e një debati të dytë presidencial në SHBA me rivalen Kamala Harris, disa orë pasi Fox News ofroi të organizonte një përballje kandidatësh më vonë këtë muaj përpara ditës së zgjedhjeve më 5 nëntor.
Ish-presidenti republikan dhe zëvendës-presidentja demokrate, të përfshirë në një betejë të ngushtë për Shtëpinë e Bardhë, janë përballur vetëm një herë, në shtator, dhe pavarësisht sugjerimeve nga shumë media, duket se ata nuk do të takohen më përpara zgjedhjeve.
“Është shumë vonë në proces, votimi (i hershëm) tashmë ka filluar – nuk do të ketë revansh!”, ka thënë Trump në një postim në mediat sociale.
“Kamala deklaroi qartë dje se nuk do të bënte asgjë ndryshe nga Joe Biden, kështu që nuk ka asgjë për të debatuar”, shtoi Trump.
Kujtojmë se Harris kishte sfiduar më parë Trump në një debat të organizuar nga CNN më 23 tetor, por ish-presidenti nuk pranoi.
