Serbia zyrtare vazhdon të përkrah agresionin e Rusisë ndaj Ukrainës. Kryetari i Kuvendit të Serbisë, Ivica Daçiq, ka thënë se nuk mund t’i vendosin sanksione Rusisë, vendit që e mbështet Serbinë. “Nuk mund ta presim degën në të cilën jemi ulur”, ka thënë ai.

Kreyparlamentari serb ka deklaruar sot se Serbia nuk ka interes të ndjekë politikë në përputhje me interesat e Perëndimit dhe Lindjes, por në përputhje me interesat e veta dhe se “ata që kërkojnë nga Serbia t’i vendosë sanksionet Rusisë nuk janë kundër Rusisë, por kundër Serbisë”.

Daçiq tha se Serbia tani është në një situatë kur prej saj pritet të mbajë anën e dikujt, kurse secili niset nga interesat e veta, ndaj është e logjikshme që edhe Serbia të shkojë nga interesat e saj.

“Ne nuk kemi interes të ndjekim një politikë në përputhje me interesat e Lindjes dhe Perëndimit, por me interesat tona. Unë e respektoj atë që thonë nga Brukseli, por është detyrimi ynë që gradualisht ta harmonizojmë politikën tonë të jashtme me Brukselin”, tha Daçiq për televizionin publik serb (RTS).

“A do të na thonë që ne do të hyjmë nesër në BE që të harmonizojmë politikën tonë sot. Jo, thonë se kjo do të ndodhë për 10, 20 apo 30 vjet. Epo, ne do të harmonizojmë politikën tonë të jashtme pas 5, 10 apo 20 vitesh”, tha Daçiq.

Në anën tjetër, ai pyeti se a do të tërhiqnin njohjet e Kosovës, a do të ndalojnë me cenimin e integritetit territorial të Serbisë dhe mos ta detyrojnë Serbinë të vendosë sanksione ndaj shtetit që më së shumti mbron interesat e saj kombëtare dhe shtetërore.

Ai tha se Serbia e respekton parimin e integritetit territorial dhe se nuk e ka shkelur atë.

Daçiq tha se ai që kërkon që Serbia të vendosë sanksione ndaj Rusisë nuk është kundër Rusisë, por kundër Serbisë.

“Nesër do të kërkojnë që Kosova të anëtarësohet në NATO, nesër do të kërkojnë që Kosova të anëtarësohet në OKB. Dhe kujt do t’i drejtohemi, Rusisë. Nëse vendosim sanksione ndaj tyre, nuk kemi kujt t’i drejtohemi. Na ktheni parimin e integritetit territorial, anuloni njohjen e Kosovës, ne jemi të gatshëm të bisedojmë”, tha Daçiq.

“Serbia angazhohet për parimin e integritetit territorial dhe beson se nuk është mirë që është shkelur integriteti territorial i Ukrainës, por ne jemi gjithashtu dëshmitarë se ata që tani po sulmojnë Rusinë kanë shkelur integritetin territorial të Serbisë dhe e kanë bombarduar”, tha Daçiq.

Ai tha se Serbia nuk është “pion i Lindjes apo i Perëndimit.

“Ne udhëheqim politikë për interesin tonë. Nuk mund ta presim degën në të cilën jemi ulur”, tha Daçiq, duke shtuar se i vjen keq që kjo po ndodhë në Ukrainë.

Mirëpo, në Serbi ditëve të fundit ka pasur shumë zëra që kanë dënuar agresionin rus në Ukrainë dhe mos dënimin nga kreu shtetëror serb.

Profesori universitar në Universitetin e Beogradit, Ivan Videnoviq ka thënë se i vjen turp që Serbia nuk e ka dënuar agresionin rus.

“Unë jam krenar për të gjitha pjesët e ish-shtetit tim të Jugosllavisë për dënimin e agresionit të Rusisë kundër Ukrainës. Unë jam krenar për Kosovën, dikur pjesë e shtetit tim, për shkak të dënimit të agresionit të Rusisë kundër Ukrainës. Më vjen turp për shtetin tim, Serbinë”, ka reaguar Videnoviq.

Leave a Reply

Your email address will not be published.

You May Also Like

Rikthehet ndotja e ajrit në Maqedoninë e Veriut

Në Maqedoninë e Veriut është rikthyer ndotja e ajrit në shifra alarmante,…

66% e francezëve bojkotojnë zgjedhjet rajonale

Partitë e Macron e Le Pen marrin rezultate minimale larg parashikimit Si…

Premtimet njerëzore dhe premtimet politike

Kohë më parë, në TV 21M u realizua një debat televiziv në…

Ish-zyrtarët e akuzuar për keqpërdorime, ende në liri

Proceset gjyqësore kundër dhjetëra ish-zyrtarëve të Qeverisë së ish-kryeministrit, Nikolla Gruevski, të…

Gjermania aplikon reciprocitetin me Rusinë: Ndalon aterrimin e aeroplanëve rusë në Berlin

Ministria e transportit në Berlin tha se lëvizja u bë sepse Rusia…