Presidenti Joe Biden do të takohet me 10 senatorë të moderuar republikanë të hënën për të diskutuar mbi propozimin e tyre për të zvogëluar paketën e tij të ndihmës 1,9 trilionë dollarëshe për COVID-19ën, edhe pse demokratët janë të gatshëm ta miratojnë legjislacionin në Kongres pa mbështetjen e republikanëve.

Takimi i pasdites në Shtëpinë e Bardhë, do të lejojë Presidentin demokrat të shikojë mundësinë për një paketë me mbështetje dypartiake kundër pandemisë që ka lënë më shumë se 442,000 të vdekur në SHBA dhe ka goditur ekonominë e vendit.

Zoti Biden ka shprehur interes për të punuar me republikanët e Kongresit. Shtëpia e Bardhë u premtoi senatorëve republikanë “një shkëmbim të plotë pikëpamjesh”.

Republikanët propozojnë një alternativë që do të siguronte 600 miliardë dollarë ndihmë financiare – më pak se një e treta e paketës së Presidentit Biden. Shtëpia e Bardhë nuk ka treguar asnjë shenjë tërheqjeje nga propozimi i saj, që zyrtarët e administratës e kanë përshkruar si të nevojshëm për të përmbushur nevojat e vendit në krizë.

Zoti Biden dhe stafi i tij pritet t’u paraqesin senatorëve republikanë detaje se si paketa e tij e ndihmës do t’u sillte përfitime shteteve të tyre përkatëse, tha një ndihmës i Shtëpisë së Bardhë.

“Z. President, ne i njohim thirrjet tuaja për unitet dhe duam të punojmë në mirëbesim me administratën tuaj për të përmbushur sfidat shëndetësore, ekonomike dhe shoqërore të krizës COVID,” thanë senatorët republikanë Susan Collins, Lisa Murkowski, Mitt Romney dhe shtatë të tjerë në një deklaratë të hënën.

“Ne ndajmë shumë nga përparësitë tuaja,” shtuan ata.

Plani republikan nuk ofron ndihmë për shtetet dhe qeveritë lokale, një nga pikat që një këshilltar i zotit Biden tha se demokratët në Kongres e kërkojnë me ngulm. Sipas hollësive të lëshuara nga ligjvënësit, propozimi republikan gjithashtu nuk i përmbahet një tjetër kërkese të domosdoshme, duke ofruar vetëm 1000 dollarë pagesa direkte për amerikanët, krahasuar me 1,400 dollarë të kërkuara nga zoti Biden.

Miratimi i legjislacionit të ri të ndihmave jo vetëm që mund të ishte i dobishëm për amerikanët dhe bizneset por do të ofronte një provë të parë të premtimit të zotit Biden për të kapërcyer ndarjet partiake në Uashington.

Dhjetë vota republikane, bashkë me mbështetjen e 50 demokratëve dhe të pavarurve, do të ishin të mjaftueshme për ta miratuar shpejt legjislacionin dypartiak përmes Senatit me 100 vende. Nën ish Presidentin republikan Donald Trump në Kongres pati pak bashkëpunim mes dy partive për çështjet e mëdha legjislative.

Veprimi me shpejtësi i Kongresit për pandeminë është një synim kryesor i Presidentit Bajden. Por republikanët kanë vënë në pikëpyetje propozimin e tij prej 1,9 trilion dollarësh, i cili vjen pas 4 trilion dollarëve ndihma financiare të miratuara nga Kongresi vitin e kaluar./VOA/

Leave a Reply

Your email address will not be published.

You May Also Like

Autori i librave për krimet serbe në Kosovë: Po t’i deponohej Serbisë aktakuza në kohë, sot nuk do ta kishim Gjykatën Speciale

Nusret Pllana, autor i librave për krimet serbe në Kosovë, ka deklaruar…

Që nga rihapja xhamia Ajasofja u vizitua nga mbi 3.5 milionë njerëz

Imami i Xhamisë së Madhe Ajasofja në Stamboll, Ferruh Mustuer, tha se…

Pfizer do të kërkojë miratim për pilulën kundër COVID-19

Kompania farmaceutike, Pfizer, ka thënë se pilula e saj antivirale për COVID-19,…

Ibrahimi: Këta që gënjyen për kryeministrin do të marin dënimin e popullit

Zeqirja Ibrahimi / Sa keq më vjen që sot shqiptarëve duhet t’u…

Kurti: Dëshmorët janë dëshmuar tash ne duhet të dëshmohemi tek ata

Kryeministri i Kosovës, Albin Kurti, ka bërë sot homazhe te varri i…