Pas kualifikimit në Botëror, futbollistët serbë festojnë me mesazhe politiko-nacionaliste
Përfaqësuesja e Serbisë në futboll arriti të siguronte kualifikimin në Botërorin “Katari 2022”, pasi mposhti Portugalinë në minutat e fundit.
Kjo bëri që të kishte festë nga futbollistët serbë në Lisbonë. Por festa nuk ishte vetëm brenda kornizave sportive.
Pas ndeshjes, tre futbollistë serbë pozuan me mesazhe politiko-nacionaliste, duke ngritur tre gishtat. Përveç kësaj, ata kishin veshur një fanellë që përmbante mesazhe nacionaliste, dhe ku Kosova paraqitej si pjesë e Serbisë.
“Le të valëvitë flamuri i Serbisë nga Prizreni deri në Rumije (Mal të Zi)”, ishte mbishkrimi në fanellat e tre futbollistëve serbë që pozuan duke i ngritur lart tre gishta pas fitores 2:1 kundër Portugalisë në Lisbonë.
Meqë sipas rregulloreve të UEFA-s dhe FIFA-s, mesazhet politike apo nacionaliste janë të ndaluara, pritet që të merren masa ndaj futbollistëve serbë që nxitën reagime të shumta në rrjetet sociale.
