Në 24-vjetorin e masakrës së Krushës së Madhe, presidentja e Kosovës, Vjosa Osmani tha se plagët e këtij vendi janë ende të hapura. Ajo gjithashtu theksoi se fati intelektualit Ukshin Hoti ende mbetet i pazbardhur, sikurse ka mbetur i pazgjidhur edhe fati i 64 banorëve të Krushës së Madhe të cilët ende figurojnë në listat e të zhdukurve me dhunë.
Këto deklarata presidentja kosovare i bëri gjatë homazheve në kompleksin e të rënëve në Krushë të Rahovecit.
“Është vështirë të gjenden fjalë për të përshkruar dhimbjen që e kaplon gjithë popullin e Kosovës, por në veçanti familjet e Krushës së Madhe dhe të fshatrave përreth, ku sikurse çdo vit ne i përkujtojmë 241 burra e djem, 7 fëmijë e 5 gra, njëra shtatzënë, të vrarë mizorisht në mënyrën më makabre nga regjimi gjenocidal i Serbisë”, tha presidentja .
Në këtë përvjetor, presidentja përkujtoi edhe intelektualin Ukshin Hoti, i cili ende gjendet në listën e të zhdukurve.
“Teksa kujtojmë këtë ditë tmerri, plagët e Krushës së Madhe janë ende të hapura, prej më tepër se 20 vjetësh, fati intelektualit Ukshin Hoti ende mbetet i pazbardhur. I tillë mbetet edhe fati i 64 banorëve të Krushës së Madhe të cilët ende figurojnë në listat e të zhdukurve me dhunë”, tha Osmani, e cila tha se do të kërkoj në vazhdimësi që autorët e këtyre krimeve të vihen para drejtësisë.
“Ne duhet të besojmë e të angazhohemi të gjithë së bashku që ta mbrojmë të vërtetën që po mundohet të tjetërsohet dhe për ta vendosur drejtësinë. E kemi borxh për gjeneratat e ardhshme që ta ruajmë të vërtetën dhe ua kemi borxh gjeneratave të ardhshme. E drejta është se Kosova bëri luftë për paqe, e Serbia bëri gjenocid”, tha ajo.
Presidentja e Kosovës tha se nuk mund të ketë paqe në rajon pa zbardhjen e fatit të zhdukurve dhe pa vendosur drejtësinë.
Presidentja Osmani nga Krusha e Madhe vazhdoi homazhet edhe në Krushën e Vogël. Ajo tha paqja e qëndrueshme në Ballkanin Perëndimor është vetëm atëherë kur zemrat e nënave të gjejnë qetësi. “E zemrat e nënave të Kosovës nuk kanë qetësi sepse mbi 1600 kosovarë akoma janë zhdukur”, tha Osmani në Krushë të Vogël.
Më 25, 26 e 27 mars të vitit 1999, në fshatin Krushë të Rahovecit janë masakruar 243 persona, ndërsa 893 shtëpi private dhe shoqërore u dogjën.
