Përfaqësuesit politikë të shqiptarëve të Luginës së Preshevës po lobojnë në Shtetet e Bashkuara që ta vendosin çështjen e komunave në jug të Serbisë, Preshevë, Medvegjë e Bujanoc në agjendën e Kombeve të Bashkuara.

Këtë e konfirmoi për Radion Evropa e Lirë, Ragmi Mustafi, kryetar i Këshillit Kombëtar Shqiptar.

Më herët, një media lokale në Bujanoc, raportoi se përfaqësuesit e shqiptarëve nga Presheva, Medvegja dhe Bujanoci janë takuar në Nju Jork me ambasadorin e Shqipërisë në OKB, Ferit Hoxha, dhe pas këtij takimi është thënë se çështja e Luginës së Preshevës do të trajtohet në OKB.

Më 1 qershor, për herë të parë Shqipëria mori kryesimin njëmujor të Këshillit të Sigurimit të OKB-së.

Kryetari i Kombëtar Shqiptar, Ragmi Mustafi, tha se përfaqësuesit e komunitetit shqiptar që jeton në jug të Serbisë, janë duke kërkuar se në kuadër të dialogut për normalizimin e marrëdhënieve mes Kosovës dhe Serbisë të zgjidhet problemi i Luginës së Preshevës.

“Ajo që kërkohet është që të mos ketë normalizim të marrëdhënieve derisa Lugina të jetë në agjendën e zgjidhjes së problemeve në Ballkanin Perëndimor”, tha Mustafi, duke shtuar:

“Kjo do të thotë se përveç zgjidhjes së çështjes së pakicave kombëtare në Ballkanin Perëndimor përmes normalizimit të marrëdhënieve midis Prishtinës dhe Beogradit, duhet të ketë standarde uniforme për trajtimin e pakicave kombëtare”.

Mediat në Bujanoc raportojnë se kryetari i Komunës së Bujanocit, Nagip Arifi, kreu i Partisë për Veprim Demokratik, zyrtarja e kësaj partie, Ardita Sinani, dhe kryetari i Partisë Demokratike të Shqiptarëve, Ragmi Mustafa, kanë udhëtuar për në selinë e OKB-së që gjendet në Nju Jork.

Pas takimit me ambasadorin Hoxha të dielën, Arifi tha se e kanë informuar ambasadorin shqiptar për “situatën politike në Luginë dhe problemet me të cilat ballafaqohen shqiptarët në Serbi”.

Më 5 qershor, Ardita Sinani postoi në Facebook fotografi të delegacionit të përfaqësuesve politikë të shqiptarëve të Luginës në takimin me ambasadorin shqiptar në OKB, Ferit Hoxha, duke shtuar se “çështja e Luginës së Preshevës tashmë do të shtrohet në OKB”.

“Përfshirja e Luginës së Preshevës në organizatën më gjithëpërfshirëse ndërkombëtare është tejet me rëndësi për ta shpërfaqur të vërtetën e gjendjes dhe pozitës së shqiptarëve të Luginës së Preshevës”, tha ajo.
Nga Bujanoci theksohet se delegacioni nga komunat në jug të Serbisë do të ketë takime me përfaqësuesit e administratës amerikane dhe diasporës shqiptare.

Kjo nuk është hera e parë që përfaqësuesit e shqiptarëve në tri komunat në jug të Serbisë, që njihen me termin Lugina e Preshevës, kërkojnë që në kuadër të dialogut Kosovë-Serbi të përfshihet edhe statusi i pakicës kombëtare shqiptare në Serbi.

Në korrik të vitit 2018, përfaqësuesit e shqiptarëve të Luginës miratuan një deklaratë përmes së cilës u kërkonin zyrtarëve të Serbisë, Kosovës dhe Bashkimit Evropian që të përfshihej në procesin e negociatave, por edhe në dokumentin përfundimtar të marrëveshjes së Brukselit, statusin e shqiptarëve të Luginës së Preshevës.

Megjithatë, zyrtarët serbë thonë se çështjet e vetëqeverisjes lokale në komunat në jug të Serbisë, nuk mund të trajtohen në kontekstin e negociatave të Brukselit.

Që nga viti 2011, Kosova dhe Serbia kanë nisur procesin e dialogut për normalizimin e marrëdhënieve, që ndërmjetësohet nga BE-ja. Aktualisht, bartës të dialogut në nivel politik janë kryeministri i Kosovës, Albin Kurti, dhe presidenti i Serbisë, Aleksandar Vuçiq, ndërkaq po ashtu zhvillohen diskutime për çështje teknike në nivel të kryenegociatorëve.

Ndryshe, për vite me radhë përfaqësuesit politikë të shqiptarëve në Luginë të Preshevës kanë kërkuar më shumë të drejta, teksa kanë denoncuar shumë shkelje. Rasti i fundit është pasivizimi i adresave të shqiptarëve në Luginë, gjë që sipas politikanëve shqiptarë po bëhet për të ndryshuar “strukturën etnike” të këtyre komunave./REL

Leave a Reply

Your email address will not be published.

You May Also Like

Presidencialet, sot mbahet shorti i renditjes së kandidatëve në fletëvotim

Sot në KSHZ, në seancë publike do të përcaktohet me short renditja…

Kim Jong-un: Koreja e Veriut mund të përdorë armët bërthamore, nëse provokohet

Kim Jong Un paralajmëroi përsëri se Koreja e Veriut mund të përdorë…

Shpërthim i madh pranë konviktit të studentëve në Zagreb

Një shpërthim i madh është dëgjuar pranë konviktit të studentëve, Stjepan Radiq,…

Dy persona gjenden të vdekur në banesat e tyre

Një person u gjet i vdekur në banesën e tij në rrugën…

Problemet me ujin në Tearcë, “BESA” kërkon dorëheqjen e kryetarit të Komunës

“Për fat të keq sot, Instituti i Shëndetit Publik në Tetovë, ka…