Ministri i Jashtëm Turk: Bisedimet do të rifillojnë më 9 Mars në Bruksel
Bisedimet për anëtarsimin e Suedisë dhe Finlandës në NATO pritet të rifillojnnë më 9 Mars, pasi ky proces u pezullua në Janar për shkak të zemërimit të Turqisë lidhur me një protestë të mbajtur në Stokholm.
Lajmin e bëri të ditur ministri i Jashtëm turk Mevlut Çavusoglu në një konferencë për shtyp në Ankara, ku shtoi se takimi do të mbahet në Bruksel.
Por ai theksoi se Suedia ende nuk po përmbush detyrimet e saj sipas memorandumit të nënshkruar në një samit të NATO-s në Madrid Qershorin e kaluar.
“Për fat të keq, ne nuk kemi parë hapa të kënaqshëm nga Suedia për zbatimin e memorandumit të Madridit. Nuk është e mundur që ne t’i themi “po” anëtarsimit të Suedisë në NATO përpara se të shohim këto hapa.”
Suedia dhe Finlanda aplikuan vitin e kaluar për t’u bashkuar me aleancën e mbrojtjes së Atlantikut të Veriut pasi Rusia sulmoi Ukrainën, por Turqia po kundërshton.
Ankaraja akuzon Stokholmin se strehon anëtarë të grupeve terroriste dhe ka kërkuar ekstradimin e tyre si një hap drejt dhënies së dritës jeshile të anëtarësimit të Suedisë në NATO.
Ndërsa Ankaraja ka treguar se mund të miratojë anëtarsimin e Finlandës, nuk mund të thuhet e njëjta gjë për Suedinë.
