Një burrë nga Kosova është dënuar me burgim të përjetshëm në Austri.
60-vjeçari u shpall fajtor nga Gjykata e Innsbruck-ut pasi në nëntorin e vitit të kaluar e kishte mbytur gruan e tij 50 vjeçare duke e goditur 16 herë me thikë.
Burri e ka pranuar fajësinë para gjykatës.
Ai tha se e ndjera grua e tij e kishte detyruar atë të hante supë në mëngjes dhe kishte folur keq për vajzat e tij nga martesa e mëhershme.
60-vjeçari theksoi se kjo e kishte shtyer të dilte nga kontrolli, shkruajnë mediat austriake përcjell Klankosova.tv
Mjeku ligjor Walter Wahl, tha se kosovari pas kryer të aktit makabër kishte dalë për t’u shëtitur në qytet dhe e kishte lënë të plagosur bashkëshorten në banesë.
Wahl tha se për shkak të mosofrimit të ndihmës së shpejtë, ajo ka ndërruar jetë.
Sipas tij pas një orë e gjysmë, kosovari kthehet në objektin ku banonte dhe i bie ziles së fqiut.
Atë e njoftoi për rastin dhe i kërkoi të thërriste policinë, raportojnë mediat austriake përcjell Klankosova.tv
Gjyqtarja Helga Moser, e ka shpjeguar në vendimin e saj se brutaliteti i tepruar i aktit, pra goditja e disahershme me thikë, ikja nga vendi i ngjarjes dhe mosofrimi i ndihmës për të shpëtuar jetën e të plagosures, kanë qenë arsyet rënduese në masën e dënimit me burgim të përjetshëm.
Vendimi ende nuk ka hyrë në fuqi.
