Tetë ditë pas sulmit terroristë në fshatin Banjskë të Zveçanit, autoritetet shtetërore të Serbisë kanë arrestuar, Milan Radoiçiq, udhëheqësin e grupit të armatosur.
Ministria e Punëve të Brendshme e Serbisë ka njoftuar se ka arrestuar Milan Radojiçiq, i cili para pak ditësh kishte pranuar se ishte pjesë grupit terrorist që sulmoi Policinë e Kosovës.
“Më 3 tetor 2023, punonjësit e policisë së Drejtorisë së Policisë Kriminale kanë kontrolluar banesën dhe lokalet e tjera të Milan Radoiçiqit, i cili është urdhëruar që policia të ndalojë deri në 48 orë. Ai është sjellë në Prokurorinë e Lartë Publike në Beograd me një kallëzim penal”, thotë MPB e Serbisë, raportin N1.
Ish-nënkryetari i Listës Serbe, Milan Radoiçiq, ka marrë përgjegjësinë për ngjarjet në fshatin Banjskë.
Në sulmin terroristë të 24 shtatorit në fshatin Banjskë të Zveçanit, ka mbetur i vrarë rreshteri i Policisë së Kosovës, Afrim Bunjaku dhe ishte plagosur polici tjetër Alban Rashiti. Në këtë aksion kanë mbetur të vrarë edhe 3 pjesëtarë të grupit të uniformuar dhe të armatosur.
