Një monument i kohës sovjetike që simbolizon miqësinë midis Rusisë dhe Ukrainës u çmontua në Kiev, tha kryebashkiaku i qytetit.
Statuja përshkruante një punëtor ukrainas dhe rus në një bazament, duke mbajtur lart së bashku një urdhër miqësie sovjetike. Statuja ishte e vendosur nën “Harkun e Miqësisë së Popullit”, e ngritur në vitin 1982 për të përkujtuar 60-vjetorin e Bashkimit Sovjetik.
“Ky monument simbolizonte miqësinë mes kombeve ukrainase dhe ruse. Tani shohim se çfarë është kjo “miqësi” – shkatërrimi i qyteteve të Ukrainës, shkatërrimi i jetëve të ukrainasve, vrasja e dhjetëra mijëra njerëzve paqësorë. Jam i bindur se një monument i tillë ka një kuptim krejtësisht tjetër tani”, tha kryetari i bashkisë së Kievit Vitaly Klitschko.
