Rusia vijon sulmet në Ukrainë. Mbrëmjen e së martës (6 qershor), forcat ruse bombarduan rajonin ukrainas të Khersonit, duke lënë të vdekur një person dhe duke plagosur një tjetër. Sakaq, po ditën e djeshme, diga kritike Nova Kakhovka në pjesën e kontrolluar nga Rusia të Kherson u shkatërrua, duke përmbytur pjesë të mëdha të Kherson dhe duke detyruar evakuimin e mijërave qytetarëve.
Zyrtarët ukrainas kanë bërë me dije mëngjesin e kësaj të mërkure (7 qershor) se rreth 42 mijë persona janë në rrezik nga përmbytjet në të dy anët e lumit Dnipro, ndërsa paralajmëruan situatë kritike gjatë ditës së sotme.
Parashikimi erdhi pasi shefi i ndihmës i OKB-së, Martin Griffiths i tha këshillit të sigurisë se thyerja e digës “do të ketë pasoja të rënda dhe me ndikim të gjerë për mijëra njerëz në Ukrainën jugore në të dy anët e vijës së frontit përmes humbjes së shtëpive, ushqimit, ujit të sigurt dhe mjeteve të jetesës”.
“Përmasat e mëdha të katastrofës do të realizohen plotësisht vetëm në ditët në vijim,” tha ai.
Ndërkohë Rusia ka hedhur poshtë akuzat e Ukrainës për shkatërrimin e digës, teksa pretendon se përgjegjës për ngjarjen është vetë Kievi.
