Emisarë nga disa vende perëndimore u larguan nga një seancë e Kombeve të Bashkuara dje, ku po fliste komisionerja ruse për të drejtat e fëmijëve, të cilin Gjykata Ndërkombëtare Penale (ICC) dëshiron ta arrestojë për krimet e luftës të dëbimit të paligjshëm të të miturve.
Kujtojmë se më 17 mars, ICC-ja lëshoi urdhra për arrestimin e Putinit dhe Maria Lvova-Belovës, komisioneres ruse për të Drejtat e Fëmijëve, për krimin e luftës të dëbimit të paligjshëm të fëmijëve nga territori i Ukrainës i pushtuar nga forcat ruse.
Lvova-Belova mori pjesë në një takim jozyrtar të Këshillit të Sigurimit të OKB-së të thirrur nga Rusia, për të diskutuar evakuimin e fëmijëve ukrainas nga zona e konfliktit. Kujtojmë që Rusia mori presidencën e Këshillit të Sigurimit pak ditë më parë (1 prill).
“Ndërsa Rusia mban presidencën e Këshillit të Sigurimit, ne do të shfrytëzojmë çdo mundësi për të kundërshtuar pozicionin e tyre për përhapjen e dezinformatave”, tha Linda Thomas-Greenfield, ambasadorja e SHBA në OKB.
Ajo shtoi se SHBA dhe Britania e Madhe bllokuan transmetimin në internet të takimit, në mënyrë që Lviv-Belova të mos merrte “një platformë ndërkombëtare për të përhapur dezinformata dhe për të mbrojtur aktivitetet e saj të tmerrshme në Ukrainë”.
Përfaqësues të Shteteve të Bashkuara, Britanisë, Shqipërisë dhe Maltës, u larguan nga salla e konferencave gjatë fjalimit të Lvova-Belovës.
I dërguari rus Vasili Nebenzia tha se ky është një tregues i qartë i “indiferencës së tyre ndaj fatit të fëmijëve nga Donbasi dhe Ukraina”.
