Presidenti amerikan Donald Trump po e kalon fundjavën e festës në pronën e tij në Florida, ndërsa demokratët dhe republikanët presin të shikojnë nëse ai do të nënshkruajë një paketë ligjore që përmban asistencën për pandeminë dhe financimin e buxhetit të qeverisë, projektligje të cilat ai i pati kritikuar ashpër këtë javë.

Legjislacioni, i cili miraton shpenzime prej 2.3 trilionë dollarësh ku përfshihen 892 milionë dollarë asistencë për koronavirusin, është dërguar nga Uashingtoni në klubin e tij në Mar-a-Lago ku pret firmën e tij. Presidenti Trump nuk ka kërcënuar konkretisht me vendosjen e vetos ndaj projektligjit, por ai i befasoi ligjvënësit e të dyja partive, duke e quajtur një “turp” ligjin që ishte miratuar në Dhomën e Përfaqësuesve dhe në Senat, pas muajsh të tëra negociatash.

Presidenti tha se projektligji u jep shumë para interesave të veçanta dhe ndihmës për jashtë. Ai tha se pagesat e drejtpërdrejta prej 600 dollarësh për shumicën e amerikanëve, duhet të rriten në 2 mijë dollarë. Kjo u pa si një kritikë ndaj vetë anëtarëve të Partisë së tij Republikane, të cilët u kishin rezistuar përpjekjeve të demokratëve për të negociuar pagesa më të mëdha.

Një mbyllje e pjesshme e qeverisë do të fillojë në orët e para të së martës, nëse Presidenti Trump nuk e nënshkruan projektligjin. Kongresi planifikon të rikthehet në punë të hënën, duke ndërprerë kështu pauzën e zakonshme për Krishtlindjen, dhe mund të miratojë një masë të përkohshme që do të financonte qeverinë për disa ditë ose javë të tjera, deri në zgjidhjen e ngërçit.

Ligjvënësit pritet të votojnë të hënën për të rrëzuar veton e Presidentit Trump ndaj një ligji që autorizon programe në fushën e mbrojtjes me vlerë prej 740 miliardë dollarësh. Nëse votohet në Dhomën e Përfaqësuesve, Senati mund të votojë që të martën. Për t’u rrëzuar vetoja e presidentit, nevojiten dy të tretat e votave në të dyja dhomat e legjislativit.

Presidenti Trump e ka kritikuar ligjin për mbrojtjen në disa aspekte, duke pretenduar pa dhënë shpjegime se ligji ndihmon Kinën, si dhe ka kërkuar heqjen e frazave që lejojnë ndryshimin e emrave të bazave ushtarake që nderojnë udhëheqësit e Konfederatës. Ai gjithashtu ka kërkuar shtimin e një klauzole që e bën më të lehtë paditjen e kompanive të mediave sociale për materiale të publikuara nga përdoruesit e tyre.

Kryetarja e Dhomës së Përfaqësuesve, Nancy Pelosi, e quajti veton e Presidentit Trump “një gjest tronditës shpërfilljeje që dëmton trupat ushtarake të vendit”.

Megjithatë, zonja Pelosi e ka mirëpritur thirrjen e Presidentit Trump për pagesa të drejtpërdrejta prej 2 mijë dollarësh për të gjithë amerikanët që gjenden nën një nivel të caktuar të ardhurash dhe të enjten i nxiti republikanët ta sfidojnë Presidentin Trump, duke mos lejuar rritjen e pagesave.

Zonja Pelosi ka njoftuar se synon të organizojë një tjetër votim të hënën.

Shtëpia e Bardhë nuk pranoi të japë hollësi mbi planet e presidentit gjatë Krishtlindjeve. Ajo tha se “gjatë stinës së festave, Presidenti Trump do të vazhdojë të punojë pa pushim për popullin amerikan. Axhenda e tij përfshin shumë takime dhe telefonata”.

Megjithatë, Presidenti Trump u fotografua të enjten dhe të premten duke luajtur në fushat e tij të golfit pranë Mar-a-Lagos në Florida. Mediat njoftuan se atij iu bashkua në Ditën e Krishtlindjes edhe aleati i tij i afërt, Senatori republikan Lindsey Graham./VOA

Leave a Reply

Your email address will not be published. Required fields are marked *

You May Also Like

“Mosparaqitja e Ahmetit dhe Grubit si dëshmitarë, vulosi dënimet e përjetshme për herë të dytë”

Gjykata e Apelit në Shkup sot ka konfirmuar vendimin e Gjykatës Themelore…

Bugajski: Nëse rishikohen territoret në Kosovë, shqiptarët e Maqedonisë mund të kërkojnë bashkim me Shqipërinë

Ndërsa pandemia e koronavirusit shqetëson Uashingtonin, administrata e Trump pa dashje po…

Kurti i publikon me emra e foto: Vrasja e Aganit u urdhërua nga këta dy persona

Faton Kurti, kryetar i Republikanëve të Kosovës, ka thënë se vrasja e…

Hallaçi: Kërkoj zbardhjen e rastit të Kumanovës

Ju bejë Apel te gjithë Shqiptarve mbarë kombëtarë për hirë se vertetës…

Avokatja e Grupit të Kumanovës: Qeveria e Albin Kurtit do t’i lirojë djemtë tanë!

Kërkesa për hetim ndërkombëtar të rastit të Lagjes së Trimave të Kumanovës…