Më 2 korrik, 1990, 114 delegatë miratuan publikisht Deklaratën Kushtetuese, me të cilën Kosova u shpall njësi e veçantë në kuadër të federatës së atëhershme jugosllave.

Ky ishte një akt historik i pritur moti dhe që shprehte aspiratat shekullore të popullit të Kosovës për pavarësi shtetërore e territoriale nga Serbi, përcjell Klankosova.tv.

Dy muaj pas shpalljes së Deklaratës Kushtetuese, që në popull njihet edhe si Deklarata e Pavarësisë, më 7 shtator të vitit 1990 në Kaçanik, të njëjtët delegatë nxorën aktin më të lartë juridik – Kushtetutën e Republikës së Kosovës, e njohur si Kushtetuta e Kaçanikut, e me këtë ata edhe formalisht Kosovën e shpallën Republikë.

Serbia, fill pas shpalljes së Deklaratës Kushtetuese, vendosi gjendjen e jashtëzakonshme në Kosovë, duke suprimuar me forcën e tankeve të gjitha institucionet e Kosovës, duke filluar nga Kuvendi e Këshilli Ekzekutiv i tij dhe deri tek të gjitha institucionet e tjera shkencore, arsimore e kulturore.

Deklarata Kushtetuese e 2 korrikut, shënoi pikënisjen e shtetësisë së Kosovës.

Teksti i plotë i Deklaratës Kushtetuese:

  1. Me këtë deklaratë shprehet dhe shpallet qëndrimi burimor kushtetues i popullsisë së Kosovës dhe i këtij Kuvendi si akt i vetëvendosjes politike në kuadër të Jugosllavisë.
  2. Ky kuvend duke e shpallur nga ana e tij dhe në nivel të tij Kosovën si njësi të barabartë në Jugosllavi, në bazë të principeve të demokracisë autentike mbi respektimin e vullnetit të njerëzve dhe të kolektiviteteve njerëzore dhe kombëtare, pret konfirmimin e këtij akti konstitutiv të tij në Kushtetutën e Jugosllavisë me mbështetje të plotë të opinionit demokratik në Jugosllavi dhe të opinionit ndërkombëtar.
  3. Ky kuvend Kosovën dhe pozitën e re kushtetuese të saj e konfirmon si bashkësi politiko-kushtetuese dhe pozitë politiko-kushtetuese të përbashkët të qytetarëve dhe nacionaliteteve të barabarta të Kosovës, ku shqiptarët si shumicë e popullsisë së Kosovës dhe një ndër popujt më numerikë në Jugosllavi, si dhe serbët dhe të tjerët në Kosovë konsiderohen popull-komb dhe jo kombësi (pakicë kombëtare).
  4. Në ndërkohë, deri në aplikimin definitiv juridik të kësaj Deklarate Kushtetuese, Kuvendi dhe organet e pushtetit të Kosovës marrëdhëniet e tyre në rendin kushtetues të Jugosllavisë i mbështesin në Kushtetutën në fuqi të Jugosllavisë dhe jo në amendamentet e Kushtetutës së RS të Serbisë të vitit 1989, me ç’rast bëhet edhe anulimi i vendimit të Kuvendit të Kosovës i datës 23 mars 1989 mbi dhënien e pëlqimit në këto amendamente.
  5. Kuvendi i Kosovës deri në nxjerrjen e Kushtetutës së re të Kosovës tash e tutje do të komunikojë publikisht me këtë emërtim, duke e emërtuar njëkohësisht bashkësinë shoqërore-politike organ i së cilës është, vetëm si Kosovë.

Prishtinë, më 2 korrik 1990.

Deklarata është deponuar në kuvend edhe në gjuhën serbe, gjë që e dëshmon dokumenti në fotografinë e mëposhtme:

Leave a Reply

Your email address will not be published.

You May Also Like

Putin me çdo kusht po tenton të ndalë informimin e drejtë për luftën në Ukrainë, ua kufizon rusëve qasjen në të përditshmen gjermane Die Welt

Presidenti rus Vladimir Putin po i frikësohet informimit të drejtë dhe raportimit…

Ja pse puçistët anti-Kurti kanë frikë nga zgjedhjet e parakohshme në Kosovë

Shkruan:Skender Kapiti / Blloku apo fronti antilegjitim dhe verbëria e injoranca korruptive…

Shokuese: Media iraniane sugjeron bombardimin e kampit të MEK në Manëz me DRONË dhe RAKETA balistike

Një gazetë elektronike iraniane e lidhur me Gardën Revolucionare sugjeron sulmimin e…

Mehaj: Kosova duhet të anëtarësohet në NATO dhe BE

Ministri i Mbrojtjes, Armend Mehaj, ka kërkuar nga Shtetet e Bashkuara të…

Temperatura të ulëta në disa pjesë të SHBA-ve: Seattle, Oregon e Portland shpallin gjendje të jashtëzakonshme

Temperaturat e ulëta kanë goditur veriperëndimin e Shteteve të Bashkuara të Amerikës.…